افغانستان ۾ امن ۽ استحڪام جي حوالي سان پاڪستان قائداڻو ڪردار ادا ڪيو آهي: صدر

اسلام آباد – 19 جنوري (اي پي پي) صدر ڊاڪٽر عارف علوي چيو آهي ته افغانستان ۾ امن ۽ استحڪام جي حوالي سان پاڪستان قائداڻو ڪردار ادا ڪيو آهي ۽ عالمي سطح تي پاڪستان جي قيادت جي موقف جو اعتراف ڪيو پيو وڃي، ملڪ ۾ عورتن، خصوصي ماڻهن ۽ نوجوانن جي ڀلائي لاءِ ٺوس قدم کنيا ويا آهن، مستقبل انفارميشن ٽيڪنالاجي جو آهي. صدر پنهنجي هڪ انٽرويو ۾ انفارميشن ٽيڪنالاجي جي اهميت کي اجاگر ڪندي چيو ته آءِ ٽي جي شعبي جو روانگي واپار وڌي اٽڪل 2 ارب ڊالر ٿي ويو آهي، جيڪو هن سال جي آخر تائين ساڍا 3 ارب ڊالر تائين پهچي ويندو، ٽن چئن سالن ۾ ملڪ جي ٻين مصنوعات جي ڀيٽ ۾ آءِ ٽي جو روانگي واپار وڌيڪ ٿيڻ جو امڪان آهي، 27 – 2026ع تائين آءِ ٽي روانگي واپار 8 کان 10 ارب ڊالر تائين پهچڻ جي اميد آهي، مستقبل جي نئين انڊسٽري آءِ ٽي آهي ۽ دنيا کي ان جي ضرورت آهي جنهن جو پاڪستان کي تمام گهڻو فائدو ٿيندو. هن پارليامينٽ جي ڊيجيٽلائيزيشن جي حوالي سان چيو ته ان سان پارليامينٽ جي ڪارڪردگي وڌيڪ بهتر ٿيندي. افغانستان جي حوالي سان هن چيو ته پاڪستان افغانستان ۾ امن جي لاءِ تمام وڏو ڪردار ادا ڪيو آهي، افغانستان کي اڪيلو ٿيڻ کان بچائڻ ۾ مدد فراهم ڪئي ۽ دنيا ۾ بهتر انداز ۾ پيش ڪيو. هن چيو ته افغانستان ۾ امن جو سڀ کان وڌيڪ فائدو پاڻ افغانستان ۽ ان کانپوءِ پاڪستان کي ٿيندو. ملڪي يونيورسٽين م منشيات جي استعمال جي روڪٿام جي حوالي سان قدمن جو ذڪر ڪندي صدر چيو ته هن ان سلسلي ۾ يونيورسٽين جي وائيس چانسلرز سان ملاقاتون ڪيون، اهڙي طرح هايئر ايجوڪيشن ڪميشن مان هڪ پاليسي پڻ منظور ڪرائي وئي جنهن تحت يونيورسٽين ۾ خصوصي ڪميٽيون جوڙيون ويون جن کي نوجوانن کي منشيات جي لعنت کان محفوظ رکڻ ۽ ان حوالي سان آگاهي سان گڏوگڏ يونيورسٽين م منشيات جي خاتمي جي ٻين قدمن جي ذميواري پڻ ڏني وئي. صدر سرڪاري کاتن جي خلاف شڪايتن جي ازالي جي لاءِ محتسب جي اداري کي انتهائي اهميت وارو قرار ڏيندي چيو ته اهو بنا معاوضي انصاف حاصل ڪرڻ جو آسترين ترين رستو آهي جنهن جي ذريعي شڪايتن تي سراسري طور 58 ڏينهن ۾ فيصلو ٿي وڃي ٿو. گذريل سال ڏيڍ لک جي لڳ ڀڳ ڪيسز اڪلايا ويا. انهن فيصلن بابت آگاهي پيدا ڪرڻ جو پڻ اهتمام ڪيو وڃي ٿو ته جيئن عوام ان سهولت مان وڌ کان وڌ فائدو کڻي سگهي. پاڪستان ۾ آن لائين تعليم جي رجحان بابت صدر چيو ته اهو تعليم جو سستو ذريعو آهي، اعليٰ تعليم جي فروغ جي لاءِ آن لائين تعليم جي سهولت وڌائڻ جي ضرورت آهي، اها پاڪستان جي مستقبل جي ضرورت آهي، ايڇ اي سي آن لائين تعليم تي پهرين پاليسي ٺاهي آهي، ان سان تعليم جي ميدان ۾ تمام گهڻي بهتري ايندي. صدر خصوصي ماڻهن جي ڀلائي ۽ تعليم ۽ تربيت جي قدمن جو حوالو ڏيندي چيو ته اسان ڪوشش ڪئي ته خصوصي ٻارن جي تعليم ۽ تربيت جي لاءِ عام اسڪولن ۾ سهولتن جو اهتمام ڪيو وڃي، اهڙي طرح عام عوامي جاين تي انهن جي لاءِ پهچ آسان بڻائي وڃي، وهيل چيئرز ۽ عوامي جاين تي ريمپس جي تعمير جي لاءِ خصوصي هدايتون جاري ڪيون وڃن، اهڙي طرح انهن جي تعليم ۽ تربيت سان گڏوگڏ باعزت روزگار جي موقعن جي فراهمي جي ذريعي پاڻڀرو بڻائڻ تي پڻ ڌيان ڏنو پيو وڃي. پاڪستان ۾ اقليتن جي حقن بابت ڳالهائيندي صدر ڊاڪٽر عارف علوي چيو ته ان حوالي سان وڏي مثبت تبديلي آئي آهي، اقليتن جي حقن جي تحفظ جي حوالي سان تمام گهڻي بهتري آئي آهي، ان بابت آگاهي پيدا ٿي آهي، اعليٰ سطح تي فوري ايڪشن ورتو وڃي ٿو. سيالڪوٽ سانحي تي مجموعي طور تي پاڪستان جو ردعمل مثبت اڳڀرائي جو عڪاس آهي، ان جي ابتڙ ڀارت ۾ مسلمانن کانپوءِ هاڻي ٻين اقليتن سان پڻ اڻوڻندڙ سلوڪ ڪيو پيو وڃي. عورتن جي حقن جي تحفظ جي حوالي سان صدر چيو ته ان سلسلي ۾ هن پاڻ ۽ بيگم ثمينه علوي تمام گهڻي محنت ڪئي آهي، عورتن کي وراثتي حق نه ڏيڻ هڪ وڏو چئلينج آهي، ان مقصد جي لاءِ قانونسازي ۽ قانون لاڳو ڪرڻ جي لاءِ ڪم ڪيو، اهڙي طرح عورتن جي تعليم ۽ تربيت تي پڻ ڌيان ڏنو پيو وڃي، عورتن کي هنر جي فراهمي سان گڏوگڏ پنهنجو ڪاروبار شروع ڪرڻ جيل اءِ آسان قرضن جي صورت ۾ مالي مدد پڻ ڏني پئي وڃي. هن چيو ته ان ڳالهه جو خصوصي اهتمام ڪيو پيو وڃي ته عورتن کي حڪومت پاران فراهم ڪيل سهولتن بابت مڪمل آگاهي حاصل هجي ته جيئن اهي انهن سهولتن مان فائدو کڻي سگهن. عورتن ۾ بريسٽ ڪينسر بابت بيگم ثمينه علوي جي سرپرستي ۾ ڀرپور آگاهي مهم جا مثبت اثر پيا آهن، جلد تشخيص سبب علاج جا امڪان وڌيا آهن، عورتن ۽ خصوصي ماڻهن جي ڀلائي لاءِ گذريل ٻن ٽن سالن ۾ جيترو ڪم ٿيو آهي اڳ ۾ ڪڏهن ناهي ٿيو، ان عمل ۾ عالم سڳورن پاران پڻ تعاون حاصل رهيو، اها پاڪستان جي لاءِ وڏي مثبت اڳڀرائي آهي. هن چيو ته اسان معاشري ۾ روزگار جا موقعا وڌائڻ تي ڌيان ڏنو، روانگي واپار ۽ تعميرات جي شعبي ۾ واڌ جا روزگار تي مثبت اثر پيا آهن. صدر چيو ته وزيراعظم عمران خاان جي فلاهي رياست جي تصور جي حوالي سان ڪامياب جوان ۽ ڪامياب پاڪستان پروگرامز اهم اڳڀرائي آهي جن تحت ڪاروبار جي لاءِ بنا وياج جي قرض فراهم ڪيا پيا وڃن، معيشت جي بهتري لاءِ ضروري آهي ته هر طبقي کي اڳتي وڌن جو رستو ڏيڻ گهرجي. صدر اليڪٽرانڪ ووٽنگ جي حوالي سان چيو ته مستقبل ۾ ووٽنگ آن لائين ٿيندي، عام چونڊ عمل جي تڪرارن ۽ مُشڪلاتن کان بچڻ جي لاءِ اليڪٽرانڪ ووٽنگ بهترين حل ثابت ٿيندو، آن لائين ووٽنگ جي سهولت جي ڪري اوورسيز پاڪستاني پڻ پنهنجو ووٽ ڪاسٽ ڪري سگهندا، ان حوالي سان سمورن حصيدارن سان گڏجي هوم ورڪ ڪيو ويو آهي تنهن ڪري هاڻي بابت وڌيڪ دير نه ٿيڻ گهرجي. سال 2021ع پوري پاڪستان جي لاءِ آزمائش جو سال رهيو، ڪوويڊ ۽ ان جي معاشي اثرن جي ڏس ۾ پاڪستان ۽ ان جي عوام جو عزم مثالي رهيو آهي، ان حساب سان اسان کي نمايان ڪاميابيون مليون آهن. هن چيو ته وزيراعظم عمران خان جي قيادت ۾ پاڪستان ڪوويڊ جي خلاف جنگ جي خلاف ڪارڪردگي ڏيکاري آهي، اهڙي طرح فڪري لحاظ کان پڻ پاڪستان جي قيادت اهم ڪردار ادا ڪيو آهي. وزيراعظم عمران خان جي مذهب جي تقدس جي حوالي سان موقف جو عالمي سطح تي اعتراف ڪيو ويو آهي، روس جي صدر جو تازو بيان ان جو واضح ثبوت آهي. هن چيو ته ڪورونا کي بهتر انداز ۾ منهن ڏنو ويو، جڏهن ته عالمي سطح تي ٿيندڙ بندشن جا اثر پاڪستان ۾ ضرور ظاهر ٿيا آهن. صدر پينشنرز جي سهولت لاءِ کنيل قدمن کي پڻ اجاگر ڪيو ۽ چيو ته آن لائين سهولت جي ڪري پينشنرز کي تمام وڏو ريليف مليو آهي.