فارن فنڊنگ ڪيس ۾ پاڪستان تحريڪ انصاف سرخرو ٿي آهي، ن ليگ ۽ پيپلزپارٽي جي فنڊنگ جو جائزو به ماڻهن جي سامهون اچڻ گهرجي: چوڌري فواد حسين

اسلام آباد – 04 جنوري (اي پي پي) اطلاعات ۽ نشريات واري وفاقي وزير چوڌري فواد حسين چيو آهي ته فارن فنڊنگ ڪيس ۾ پاڪستان تحريڪ انصاف سرخرو ٿي آهي، ن ليگ ۽ پيپلزپارٽي جي فنڊنگ جو جائزو به ماڻهن جي سامهون اچڻ گهرجي، اليڪشن ڪميشن کان مطالبو آهي ته هو ن ليگ پيپلزپارٽي ۽ پي ٽي آءِ جي فنڊنگ بابت رپورٽ گڏ منظر عام تي آڻي، پي ٽي آءِ واحد پارٽي آهي جنهن جو قانوني ۽ تفصيلي فنڊنگ جو نظام موجود آهي، سڄي دنيا مان تحريڪ انصاف جا ڪارڪن پارٽي کي فنڊنگ ڪن ٿا، پي ٽي آءِ وٽ سڀني ڊونرز جا تفصيل موجود آهن، اليڪشن ڪميشن ۾ جيڪا رپورٽ پيش ٿي آهي اها اسان جي حڪومت ٺهڻ کان اڳ جي آهي، ڪجهه ٽي وي چئنلن 31 ڪروڙ روپين جو نقطو اٿاريو آهي، هڪ ٽرانزيڪشن 16 ڪروڙ روپين ۽ ٻي 15 ڪروڙ روپين جي آهي، جنهن کي ٻيهر ڪائونٽ ڪيو ويو. اهو معاملو به اليڪشن ڪميشن ۾ ٻڌڻي هيٺ ايندو، پي ٽي آءِ هڪ هڪ روپئي جو حساب اليڪشن ڪميشن کي ڏنو آهي، ائين لڳي رهيو آهي ته وڏن ٽي وي چئنلن جي ايڊيٽوريل پاليسي ن ليگ طئي ڪري رهي آهي، آڊيو ٽيپس مان ميڊيا جي آزادي کي خطرو آهي، حيرانگي آهي ته ميڊيا تنظيمون ان تي خاموش ڇو آهن، وفاقي ڪابينا جي اجلاس ۾ ملڪ ۾ کاڌي پيتي جي شين جي قيمتن جو جائزو ورتو ويو، هفتيوار مهانگائي جي شرح ۾ 0.5 سيڪڙو گهٽتائي ٿي آهي، کاڌي پيتي جي شين جي قيمتن ۾ سراسري 0.7 سيڪڙو گهٽتائي ٿي آهي، جڏهن ته 33 شين جي قيمتن ۾ 2.3 سيڪڙو لاٿ رڪارڊ ڪئي وئي. وفاقي ڪابينا جي اجلاس کانپوءِ اطلاعات ۽ نشريات واري مملڪتي وزير فرخ حبيب سان گڏ بريفنگ ڏيندي اطلاعات ۽ نشريات واري وفاقي وزير چوڌري فواد حسين چيو ته پي ٽي آءِ جي فارن فنڊنگ ڪيس ۾ پاڪستان تحريڪ انصاف سرخرو ٿي آهي، هن چيو ته اسان چاهيون ٿا ته ن ليگ ۽ پيپلزپارٽي جي فنڊنگ جو جائزو عوام آڏو اچڻ گهرجي، پي ٽي آءِ واحد پارٽي آهي جنهن جو اڪائونٽنگ ۽ فنڊنگ جو نظام تفصيلي طور تي موجود آهي. ڪيترن ئي ٻين پارٽين ۾ ته فنڊنگ جا معاملا وڏيرن ۽ ڪاروباري ماڻهن سان هلن ٿا. نواز شريف ن ليگ جو اڪائونٽ به مني لانڊرنگ جي لاءِ استعمال ڪيو. هن چيو ته پي ٽي آءِ واحد پارٽي آهي جنهن جو قانوني ۽ تفصيلي فنڊنگ جو نظام موجود آهي. سڄي دنيا مان تحريڪ انصاف جا ڪارڪن پارٽي جي فنڊنگ ڪن ٿا. هن چيو ته عمران خان جڏهن شوڪت خانم اسپتال ٺاهي ته پهرين گڏجاڻي ۾ سڀني ڊاڪٽرن چيو ته مفت علاج ممڪن نه آهي، اڄ شوڪت خانم اسپتال 70 سيڪڙو مريضن جو مفت علاج ڪري رهي آهي، هن چيو ته شوڪت خانم اسپتال کي عمران خان جي نالي تي اربين روپين جو عطيو سڄي دنيا مان ملي ٿو، پارٽي جي سطح تي اهو اعتماد وزيراعظم جي ذات تي ڪيو وڃي ٿو، هن چيو ته آمريڪا، لنڊن ۽ پاڪستان ۾ تحريڪ انصاف جي ڪارڪنن پنهنجي حيثيت موجب پارٽي جي فنڊنگ ڪن ٿا، هن چيو ته پارٽي جي چيف اڪائونٽنٽ ۽ ان جي ٽيم کي مبارڪباد پيش ڪريون ٿا جو هنن ڊگهي عرصي کان پارٽي جي فنڊنگ جي معاملي کي انتهائي حفاظت سان سنڀالي رکيو آهي، هن چيو ته پي ٽي آءِ کي ننڍي ننڍي رقم به فنڊنگ طور ملي ٿي، اليڪشن ڪميشن ۾ جيڪا رپورٽ پيش ڪئي وئي آهي اها اسان جي حڪومت ٺهڻ کان اڳ جي آهي، ن ليگ جي دور جي اسٽيٽ بئنڪ جي رپورٽ کي اڄ اسڪروٽني ڪميٽي پي ٽِي آءِ جي فنڊنگ لاءِ اليڪشن ڪميشن ۾ بنياد بڻايو، رپورٽ ۾ ٻڌايو ويو آهي ته پي ٽي آءِ جي 26 مان 8 اڪائونٽ غير فعال آهن، 18 اڪائونٽن مان پي ٽي آءِ جا 8 اڪائونٽ فعال آهن انهن مان ٽرانزيڪشن به ٿي رهي آهي، فارن فنڊنگ جي حد تائين ڪو به معاملو سامهون ناهي آيو، ڪجهه ٽي وي چئنلن 31 ڪروڙ روپين جو نقطو اٿاريو ته هڪ ارب 61 ڪروڙ جي فنڊنگ مان 31 ڪروڙ روپين جو فنڊ ناهي ٻڌايو ويو، هن چيو ته پي ٽي آءِ جي 26 اڪائونٽن مان 8 ڊڪليئرڊ آهن، 10 اڪائونٽن مان 6 اڪائونٽ پي ٽي آءِ جا اڪائونٽ نه آهن، انهن کي سبسڊري اڪائونٽس طور تي ڊيل ڪيو ويندو آهي، پارٽي جي ويلفيئر ونگ جو پنهنجو اڪائونٽ آهي، اهي جدا اداري طور تي داخل آهي،چئن اڪائونٽن کان پي ٽي آءِ لاتعلقي جو اظهار ڪيو آهي، انهن مان به ننڍيون ننڍيون ٽرانزيڪشن ٿيون آهن، هڪ ٽرانزيڪشن 16 ڪروڙ ۽ ٻي 15 ڪروڙ روپين جي آهي، 16 ڪروڙ روپين جي ٽرانزيڪشن ان لاءِ ٻيڻي ڪائونٽ ٿي آهي جو هڪ اڪائونٽ مان پئسا مرڪزي اڪائونٽ ۾ آيا آهن ان مان ٻي اڪائونٽ ۾ منتقل ٿيا آهن، رپورٽ ۾ 16 ڪروڙ جي رقم کي ٻه ڀيرا جمع ڪيو ويو آهي اهڙي طرح 15 ڪروڙ روپين جي ٻي ٽرانزيڪشن به مرڪز کان صوبن کي منتقل ٿي جيڪا پڻ پي ٽي آءِ جي سبسڊري هئي، ان رقم کي به ٻه ڀيرا ڳڻيو ويو، هن چيو ته اهو معاملو اليڪشن ڪميشن ۾ غور هيٺ ايندو، هن چيو ته پي ٽي آءِ هڪ هڪ روپئي جو حساب اليڪشن ڪميشن کي ڏنو آهي، اليڪشن ڪميشن پيپلزپارٽي ۽ ن ليگ جي اڪائونٽن جي ڇنڊڇاڻ به گڏوگڏ عوام جي سامهون رکي، نواز شريف ۽ ن ليگ جي اڪائونٽن سميت پيپلزپارٽي جي اڪائونٽن جو به جائزو ٿيڻ گهرجي. وفاقي ڪابينا جي اجلاس جي حوالي سان ميڊيا کي آگاهه ڪندي اطلاعات ۽ نشريات واري وفاقي وزير چيو ته وفاقي ڪابينا حڪومت جي ڪورونا کي منهن ڏيڻ جي پاليسي، احساس پروگرام تحت غربت جي خاتمي ۽ ماحولياتي تحفظ لاءِ قدم خاص طور تي 10 بلين ٽري سونامي پروگرام جي عالمي سطح تي پذيرائي کي خوش آئنده قرار ڏنو، هن چيو ته وفاقي وزير اسد عمر ڪابينا کي ڪورونا جي نئين قسم اومي ڪرون جي حوالي سان بريفنگ ڏني. سڄي دنيا ۾ اومي ڪرون تمام تيزي سان پکڙي رهيو آهي، پاڪستان ۾ به پازيٽو ڪيسن جي انگ ۾ اضافو ٿي رهيو آهي، ڪابينا شهرين کي ماسڪ پائڻ، سماجي فاصلو برقرار رکڻ ۽ ويڪسينيشن مڪمل ڪرڻ جي تاڪيد ڪئي آهي، وفاقي وزير چيو ته اسان ٻه بلين ڊالر جي ويڪسين درآمد ڪئي آهي،سنڌ حڪومت هڪ روپئي جي به ويڪسين ناهي گهرائي، سنڌ حڪومت کي 111 ارب روپين جي ويڪسين ۽ احساس پروگرام جي مد ۾ وفاقي حڪومت اين ايف سي کان جدا ڏنا آهن پر بدقسمتي سان هن وقت سنڌ حڪومت هر معاملي ۾ پوئتي وڃي رهي آهي، اسان قومي صحت ڪارڊ جو پروگرام شروع ڪيو، سنڌ حڪومت بدقسمتي سان ان ۾ شامل نه آهي. هن چيو ته صرف پنجاب حڪومت چار سئو ارب روپيا ان پروگرام تي خرچ ڪري رهي آهي، اهو پروگرام خاندانن جي لاءِ آهي، نادرا جي اندر جيڪي خاندان رجسٽرڊ آهن، اهي پنهنجي خاندان جي سربراهه جي شناختي ڪارڊ تي رجسٽرڊ آهن، خاندان جي سربراهه جي شناختي ڪارڊ جي تصديق 8500 تي ميسيج ڪري، ڪري سگهجي ٿي ته اهي اهل آهن يا نه، هن چيو ته لاهور ڊويزن، ڊيرا غازي خان ڊويزن، ساهيوال ڊويزن جا ماڻهو مڪمل طور تي اهل ٿي چڪا آهن، خيبرپختونخوا جي عوام به صحت انصاف ڪارڊ لاءِ اهل ٿي چڪي آهي. ان جو مطلب اهو آهي ته اسپتال ۾ داخل ٿيڻ وقت 10 لک روپين تائين علاج جو خرچ حڪومت برداشت ڪندي، ان ۾ ڪو به آئوٽ ڊور علاج شامل نه آهي ڇو ته اهو پهرين ئي مفت فراهم ڪيو پيو وڃي، هن چيو ته ڪيترن ئي علائقن ۾ داڪٽر نه آهن، ماڻهن کي نجي اسپتالن ۾ وڃڻو پوي ٿو، پرائيويٽ اسپتالون به ان پروگرام تحت رجسٽرڊ آهن، اتي به 10 لک روپين تائين جي مفت علاج جي سهولت موجود آهي. هن چيو ته ڪجهه اخبارن ۾ ان پروگرام جي حوالي سان غلط تاثر ڏيڻ جي ڪوشش ڪئي پئي وڃي ته سرڪاري اسپتالن جي حوصلا شڪني ڪئي پئي وڃي، هن چيو ته سنڌ ۾ مرتضيٰ وهاب پريس ڪانفرنس ڪئي ته اسان سنڌ ۾ سرڪاري اسپتالون ٺاهي رهيا آهيون پر سنڌ ۾ سرڪاري اسپتالن جي حالت سڀني جي سامهون آهي، هن چيو ته اهو ضد ڪرڻ ته هر ڪم حڪومت ئي ڪري ممڪن ئي نه آهي، صحت جي شعبي ۾ بهتري لاءِ نجي شعبي کي شامل ڪرڻو پوندو. اطلاعات واري وزير چيو ته تعليم ۾ به نجي شعبي هڪ وڏو بار پاڻ تي کڻي رکيو آهي، جيڪڏهن اسان نجي شعبي جي حوصلا شڪني ڪنداسين ته هو اسپتال نه ٺاهي ته صحت جي معياري سهولت ممڪن نه ٿي سگهندي، وفاقي وزير چيو ته اسان نجي شعبي جي حوصلا افزائي ڪريون ٿا ته هو اچي ۽ صحت جي شعبي ۾ پنهنجون خدمتون سرانجام ڏي، هن چيو ته هن پروگرام ۾ سرڪاري اسپتالن جي آمدني ۾ به اضافو ٿيندو. ان پروگرام سان سرڪاري اسپتالن کي به پنهنجون خدمتون بهتر بڻائڻ جو موقعو ملندو، نجي شعبي کي به اهو موقعو ملندو ته هو انهن علائقن ۾ وڃي اسپتالون قائم ڪري جتي سرڪاري عملو موجود نه آهي، هن چيو ته اسان صحت جي سهولت روڪڻ لاءِ نه پر ماڻهن کي صحت جي سهولت فراه ڪرڻ لاءِ ڪم ڪرڻ چاهيون ٿا ۽ اهو تاثر بلڪل غلط آهي ته ان پروگرام سان سرڪاري بنيادي صحت مرڪز ۽ اسپتالون بند ٿي وينديون، پر سرڪاري اسپتالن جي ڪارڪردگي ته وڌيڪ بهتر ٿي ويندي. چوڌري فواد حسين چيو ته وفاقي ڪابينا جي اجلاس ۾ اليڪٽرانڪ ووٽنگ مشين متعارف ڪرائڻ ۽ ٻاهرين ملڪ پاڪستانين کي ووٽ جو اختيار ڏيڻ جي حوالي سان بريفنگ ڏني وئي، هن چيو ته اليڪشن ڪميشن اي وي ايم جي فراهمي لاءِ خط لکيو آهي، سائنس ۽ ٽيڪنالاجي واري وزارت کي هدايت ڪئي وئي آهي ته هو اليڪشن ڪميشن جي خواهشن کي نظر ۾ رکندي ان ڏس ۾ قدم کڻي ۽ اسلام آباد جي ايندڙ بلدياتي چونڊن لاءِ اي وي ايم جي خريداري جو مرحلو طئي ڪيو وڃي ۽ اليڪشن ڪميشن کي اي وي ايم فراهم ڪيون وڃن، چوڌري فواد حسين چيو ته وفاقي ڪابينا آڏو کاڌي پيتي جي شين جي قيمتن جو جائزو پيش ڪيو ويو. کاڌي پيتي جي ضروري شين جي قيمتن ۾ گهٽتائي جو رجحان آهي، هن هفتي به وڏي واضح ڪمي ٿي، هفتيوار مهانگائي جي شرح ۾ 0.5 سيڪڙو لاٿ آئي آهي، کاڌي پيتي جي شين جي قيمتن ۾ سراسري 0.7 سيڪڙو لاٿ آئي آهي، 33 شين جي قيمتن ۾ 2.3 سيڪرو لاٿ ٿي آهي، هن چيو ته ٽماٽي جي قيمت ۾ 0.31 سيڪڙو، پٽاٽي جي قيمت ۾ 0.13 سيڪڙو، پيٽل مرچن جي قيمت ۾ 0.13 سيڪڙو لاٿ ٿي آهي، ٽماٽي جي قيمت 31 ڊسمبر 2020ع تي 91 روپيا في ڪلو هئي، هن وقت 55 روپيا في ڪلو آهي، اهڙي طرح 31 ڊسمبر 2020ع تي پٽاٽي جي قيمت 44 روپيا هئي، هن وقت 41 روپيا آهي، بصر گذريل سال هن مهيني ۾ 43 روپيا في ڪلو هو، هاڻي 35 روپيا في ڪلو آهي، هن چيو ته جن کاڌي پيتي جي شين جي قيمتن ۾ لاٿ ٿي آهي، ميڊيا کي انهن جو به ذڪر ڪرڻ گهرجي، هن چيو ته وفاقي ڪابينا ناڻي واري وزارت جي سفارش تي سپليمينٽري فنانس بل سان لاڳاپيل اسٽيٽمينٽ آف ڪانٽيجنٽ لائبليٽيز کي قومي اسيمبلي ۾ پيش ڪرڻ جي منظوري ڏني. اها منظوري پاڪستان جي حڪومت طرفان عالمي ادارن کي ترقياتي منصوبن لاءِ ڏنل گرانٽي کي نظر ۾ رکندي ڏني وئي آهي، ڪابينا قائداعظم يونيورسٽي اسلام آباد ۾ نيشنل انسٽيٽيوٽ آف سيڪيورٽي اسٽيڊيز (اين آءِ ايس ايس) قائم ڪرڻ جي ايجنڊا کي وڌيڪ مشاورت لاءِ ملتوي ڪري ڇڏيو. هن چيو ته ڪابينا گهرو وزارت جي سفارش تي جوابدار عبدالقادر احسن کي برطانيه جي حڪومت حوالي ڪرڻ جي منظوري ڏني ته جيئن هو برطانيه ۾ پنهنجي ڪيسن کي منهن ڏئي سگهي، اها منظوري جوابدار جي پنهنجي درخواست تي ڏني وئي آهي، هن ڇيو ته ڪابينا نادر ممتاز وڙائچ کي ڪراچي پورٽ ٽرسٽ جو چيئرمين مقرر ڪرڻ جي منظوري ڏني آهي، ان کانسواءِ ڪابينا خوراڪ واري وزارت جي سفارش تي پاڪستان تماڪو بورڊ جي نئين سر جوڙجڪ ڪرڻ جي منظوري ڏني آهي، نئين سر جوڙجڪ کانپوءِ بورڊ تي وفاقي حڪومت، صوبائي حڪومتن ۽ واپاري ايسوسيئيشنز جي نمائندگي شامل هوندي، هن چيو ته ڪابينا منصوبابندي واري وزارت جي سفارش تي پاڪستان جي ڳڻپ واري بيورو ۾ ڊائريڪٽر عزيز الله خٽڪ کي ميمبر اڪنامڪ اسٽيٽسٽڪس، ڊاڪٽر محمدعاصم خان کي ميمبر ريسڪو مينيجمينٽ ۽ محمد سرور گوندل کي ميمبر سپورٽس سروسز مقرر ڪرڻ جي منظوري ڏني آهي، هن چيو ته ڪابينا سي پيڪ اٿارٽي ۽ چين جي ماحوليات واري وزارت جي وچ ۾ 3 هزار سولر پاور جنريشن سسٽم مهيا ڪرڻ جي لاءِ معاهدي جي منظوري ڏني آهي، اهي سولر سسٽم گوادر ۾ گهرن کي مفت فراهم ڪيا ويندا. چوڌري فواد حسين چيو ته ڪابينا نيپرا جي سالياني رپورٽ 21 -2020ع ۽ اسٽيٽ آف انڊسٽري رپورٽ 2021ع ايندڙ اجلاس تائين ملتوي ڪري ڇڏي، هن چيو ته ڪابينا دفاعي پيداوار واري وزارت جي سفارش تي برگيڊيئر محمد عاصم اسحاق کي نيشنل ريڊيو ٽيلي ڪميونيڪيشن ڪارپوريشن (اين آر ٽي سي) جو مينيجنگ ڊائريڪٽر مقرر ڪرڻ جي منظوري ڏني آهي. هن چيو ته ڪابينا منصوبابند واري وزارت جي سفارش تي بلاول انور کي نيشنل ڊزاسٽر رسڪ مينيجيمنيٽ جو چيف ايگزيڪيٽو مقرر ڪرڻ جي منظوري ڏني آهي، ڪابينا ماحولياتي تحفظ لاءِ پاڪستان جي ڀرپور نمائندگي ڪرڻ ۽ ڪارڪردگي تي موسمياتي تبديلي بابت خاص مددگار ملڪ امين اسلم جي خدمتن کي ساراهيو. صحافين جي سوالن جا جواب ڏيندي اطلاعات واري وزير چيو ته اليڪشن ڪميشن جي رپورٽ جي صفحي نمبر 84 تي چيو ويو آهي ته 26 اڪائونٽ آهن، 56 اڪائونٽن جو اليڪشن ڪميشن ڪٿي به ذڪر ناهي ڪيو، ميڊيا ۾ جنهن به خبر ڏني ان کي تصديق ڪرڻ گهرجي ها، هن چيو ته رپورٽ اسان پاڻ پبلڪ نٿا ڪري سگهون، اليڪشن ڪميشن پاڻ اها رپورٽ پبلڪ ڪري، فيڪ نيوز سان مسئلا جنم وٺن ٿا، جنهن خبر ڏني آهي 54 يا 56 اڪائونٽ آهن ته رپورٽ ۾ ان شيءَ جو ڪٿي به ذڪر نه آهي، هن چيو ته اليڪشن ڪميشن ان ڳالهه کي يقيني بڻائي ته رپورٽ جو مواد ميڊيا تي نه وڃي ۽ جيڪڏهن وڃي ته صحيح وڃي، هن چيو ته لڳي ٿوته وڏن ٽي وي چئنلن جي ايڊيٽوريل پاليسي ن ليگ طئي ڪري رهي آهي، آڊيو ٽيپس مان ميڊيا جي آزادي کي خطرو آهي، حيرانگي آهي ته ميڊيا جون تنظيمون ان تي خاموش ڇو آهن، اميد آهي ته ميڊيا جي ورڪرز تنظيمون ورڪرن جي ڳالهه ڪنديون، هن چيو ته پي ٽي آءِ اسڪروٽني ڪميٽي جي رپورٽ پبلڪ نه ڪرڻ جي ڪا به درخواست ناهي ڪئي، پر پي ٽي آءِ چيو هو ته ٽنهي پارٽين جي رپورٽ گڏ منظر عام تي آندي وڃي، اسين چاهيون ٿا ته ٽنهي پارٽين جي اسڪروٽني رپورٽ گڏ عوام جي سامهون اچي، پي ٽي آءِ وٽ سڀني ڊونرز جا تفصيل موجود آهن، 40 هزار ماڻهن جو رڪارڊ آهي جن پي ٽي آءِ کي عطيا ڏنا آهن. ڪنهن ٻي پارٽي وٽ ايترو تفيصلي رڪارڊ موجود نه آهي، هن چيو ته اسان جو مطالبو آهي ته اليڪشن ڪميشن سڀني پارٽين جي رپورٽ سامهون آڻي. هڪ سوال جي جواب ۾ هن چيو ته ميڊيا جي اونرشپ جدا هجڻ گهرجي، ايڊيٽوريل پاليسي ورڪنگ جرنلسٽ وٽ هجڻ گهرجي جيستائين ورڪنگ جرنلسٽس تي اها ذميداري نه وڌي ويندي مسئلا ٿيندا رهندا، ميڊيا ورڪرن لاءِ جهڙي طرح سان ڳالهه ٿيڻ گهرجي اها ناهي ٿي، جيڪا بدقسمتي آهي. اي پي پي/ش – چ/ر – م 21:59