وزیراعظم عمران خان دی صدارت اچ وفاقی کابینہ دااجلاس

شوگر انکوائری رپورٹ دی سفارشات دی روشنی اچ مستقبل دے لائحہ عمل اتے متعلقہ اداریں ولوں مزید کارروائی تے تفصیلی بریفنگ
اسلام آباد ۔ 2 جون (اے پی پی) وزیراعظم عمران خان دی صدارت اچ وفاقی کابینہ دااجلاس منگل کوں اتھاں منعقد تھیا ۔ وفاقی کابینہ کوں شوگر انکوائری رپورٹ دی سفارشات دی روشنی اچ مستقبل دے لائحہ عمل اتے متعلقہ اداریں ولوں مزید کارروائی تے تفصیلی بریفنگ ڈتی گئی۔ وزیراعظم اجلاس نال خطاب کریندے ہوئیں آکھیے جو حکومت ولوں شوگر انکوائری دا مقصد انہاں وجوہات اتے حقائق کوں سامنڑے گھن آونڑاں ہئی جیں دی وجہ توں کھنڈ دیاں قیمتاں ودھ گئن تے عوام تے غیر ضروری بوجھ پاتا گئے ۔ انہاں آکھیے جو انکوائری دے نتیجے اچ سامنڑے آندے حقائق دی روشنی اچ نظام اچ موجودہ خامیاں دی درستگی تے اصلاح کیتے اقدامات کیتے ویسن ۔ اجلاس اچ فیصلہ کیتا گئے جو انکوائری رپورٹ دی روشنی اچ سامنڑے آونڑ آلے حقائق دا جائزہ گھننڑ کیتے بین الوزارتی کمیٹی تشکیل بنڑائی ویسی ۔ کابینہ کوں صوبیں ولوں کنڑنک دی خریداری دے حوالے نال ہنڑ تئیں دی پیشرفت تے مستقبل اچ طلب و رسد دے تخمینیں بارے تفصیلی بریفنگ ڈتی گئی ۔اجلاس اچ فیصلہ کیتا گئے جو ایں امر کوں یقنی بنڑاونڑ کیتے مستقبل اچ ملک دے کہیں حصے اچ کنڑنک تے اٹا گھٹ نہ تھیوے تے طلب تے رسد اچ توازن رہے ہک اعلیٰ سطحی کمیٹی بنڑائی ویسی جیرھی سفارشات مرتب کریسی ۔وزیرِ اعظم سیکرٹری داخلہ کوں ہدایت کیتی جو سمگلنگ روکنڑ دے حوالے نال قائم ٹاسک فورس دی سفارشات وختی پیش کیتیاں ونجن تاں جو اسمگلنگ کوں روکنڑ دے حوالے نال مزید کاروائی کیتی ونج سگے ۔ وزیرِ اعظم کراچی اچ پی آئی اے مسافر طیارے اچ شہید تھیونڑ آلے دے خانداناں نال دلی ڈکھ دا اظہار کریندے ہوئیں آکھیے جو انسانی جان دا ضیان ناقابل تلافی اے اساں اوکھے ویلھے ڈکھی خاندان دے رلے ہوں ۔ کابینہ کوں ملک اچ کورونا وائرس دی صورت حال تے کھنڈنڑ تے قابو پاونڑ کیتے حکمت عملی تے تفصلی بریف کیتا گیا ۔اجلاس اچ پبلک ٹرانسپورٹ، مارکیٹاں، صنعتاں اچ کورونا دے حوالے نال بنڑائے گئے ایس او پیز تے عمل درآمد تے زور ڈتا گئے ۔ اجلاس اچ کورونا ٹیسٹ، ٹریکنگ اتے متاثرہ لوکاں کوں قرنطینہ اچ منتقل کرنڑ دے حوالے نال ترتیب ڈتی ونجنڑ آلی ٹی ٹی کیو حکمت عملی (ٹیسٹنگ، ٹریکنگ ، کورنٹین) دی تعریف کیتی گئی ۔ کورونا دے حوالے نال ملک اچ صحت دیاں سہولتاں کوں بہتر تے موثر استعمال کوں یقنی بنڑاونڑ دے حوالے نال ریسورس منیجمنٹ سسٹم دی افادیت کوں دی وی تعریف کیتی گئی ۔ کابینہ کورونا دے حوالے نال حکومتی حکمت عملی دے ایں امر تے زور ڈتا جو ایس او پیز دے حوالے نال عوام اچ آگاہی تے شعور ودھایا ونجے ۔کابینہ کوں ملک اچ تڈی دل دی صورتحال ، روکنڑ دے حوالے نال اقدامات تے بریفنگ ڈتی گئی ۔ کابینہ تڈی دل کوں روکنڑ دے حوالے نال این ڈی ایم اے اتے پاک آرمی دی کارکردگی دی وی تعریف کیتی ۔ وزیرِ اعظم آکھیا جو تڈی دل دے حوالے نال سارے مطلوبہ وسائل ڈتے ونجن ۔ کابینہ کو ں ڈسایا گئے جو ایشین ڈویلپمنٹ بنک ولوں غربت دی تخفیف اتے معاشرے دے غریب طبقیں کوں کرونا دے منفی معاشی اثرات توں محفوظ رکھنڑ دے حوالے نال حکومت پاکستان دی حکمت عملی اتے اقدامات دی تعریف کیتی گئی اے ۔ کابینہ محترمہ لبنیٰ فاروق ملک کوں ڈائریکٹر جنرل فنانشل مانیٹرنگ یونٹ تعینات کرنڑ دی منظوری ڈتی۔ کابینہ یوٹیلیٹی اسٹورز دے حوالے نال ایسینشل سروسز ایکٹ 1952دے نفاذ دی منظوری ڈتی۔کابینہ شکیل احمد منگنیجو کوں دسمبر 2020 تئیں چئیرمین پاکستان نیشنل شپنگ کارپوریشن تعینات کرنڑ دی منظوری ڈتی۔کابینہ مسعود بنی کوں منیجنگ ڈائریکٹر گورنمنٹ ہولڈنگز (پرائیویٹ) لمیٹیڈ تعینات کرنڑ دی منظوری ڈتی ۔ کابینہ وسیم مختار(ایڈیشنل سیکرٹری پاور ڈویژن) کوں چیف ایگزیکیٹو آفیسر سنٹرل پاور پرچیزنگ ایجنسی (گارنٹی) لمیٹڈ دا اضافی چارج ڈیونڑ دی منظوری ڈیندے ہوئیں وزارتِ پاور کوں ہدایت کیتی جو ایں آسامی کوں مستقل طور تے کرنڑ دا عمل آندے ترائے مہینے اچ مکمل کیتا ونجے ۔کابینہ کورونا توں حفاظت کیتے مقامی طور تے تیار کیتے ونجنڑ آلے ذاتی حفاظتی سامان (پی پی ای)، سینی ٹائزرز وغیرہ دی برآمد دی منظوری ڈتی۔ تاہم وزارتِ تجارت، وزارتِ صحت، وزارتِ صنعت و پیداوار اور وزارتِ سائنس اینڈ ٹیکنالوجی تے مشتمل کمیٹی کوں اختیار ہوسی جو ملکی ضرورتاں کوں سامنڑے رکھیندے ہوئیں کہیں خاص آئیٹم دی برآمد تے پابندی دا فیصلہ گھن سگن ۔کابینہ اقتصادی رابطہ کمیٹی دے 20 اتے 21مئی دے اجلاساں اچ کیتے گئے فیصلیں دی توثیق کیتی کابینہ کو بتایا گیا کہ آئندہ بجٹ موجودہ معاشی صورتحال کے تناظر میں پیش کیا جائے گا۔ وزیرِ اعظم آکھیے جو معاشی استحکام تے اصلاحات دا عمل بلا تعطل جاری رکھیا ویسی ۔ انہاں وزراءکوں ہدایت کیتی جو موجودہ حالات اتے معاشی صورتحال کوں سامنڑے رکھیندے ہوئیں وزارتاں اتے سرکاری محکمیں اچ غیر ضروری خرچیں کوں گھٹ کرنڑ تے خصوصی توجہ کیتی ونجے ۔ وزیرِ اعظم ایں امر تے زور ڈتا جو اداریں دی کاکردگی اچ بہتری گھن آونڑ دے عمل کوں مزید اگوں ودھاونڑ تے خصوصی توجہ کیتی ویسی