فلسطین بارے دنیا دی رائے بدلدی پئی اے ، او ویلھا پرے کائنی جݙاں فلسطینیاں کوں برابر دے حقوق ملسن، امن کیتے دعاگو ہیسے،وزیراعظم عمران خان دا فلسطینیاں دے نال اظہار یکجہتی دا ݙینھ مناوݨ دے موقع تے قوم توں خطاب

اسلام آباد۔21مئی (اے پی پی):وزیراعظم عمران خان فلسطینیاں دے نال بھرپور اظہار یکجہتی تے قوم کوں خراج تحسین پیش کریندے ہوئیں آکھیے جو فلسطین بارے دنیا دی رائے بدلدی پئی اے ، اوویلھا پرے کائنی جݙاں فلسطینیاں کوں برابر دے حقوق ملسن ، امن کیتے دعا کریندوں ۔ اے ڳالھ انہاں جمعے کوں فلسطینیاں دے نال اظہار یکجہتی دا ݙینھ مناوݨ دے موقع تے قوم نال آپݨے خطاب اچ آکھی اے ۔وزیراعظم آکھیے جو اڄ جیویں پاکستانی قوم فلسطینیاں دی حمایت اچ نکلی اے میکوں ٻہوں خوشی تھئی اے ، پوری قوم فلسطینیاں تے ظلم دی نشاندہی اتے مذمت کیتی ایندے تے میں اپݨی قوم کوں خراج تحسین پیش کرینداں ۔ وزیراعظم آکھیے جو اسرائیل جݙاں توں بݨیے پاکستان دا ایں مسئلہ تے ھکو موقف رہ ڳئے تے اے موقف اساݙے عظیم لیڈر بانی پاکستان قائداعظم محمد علی جناح دا ہئی جو فلسطینیاں دے نال ٻہوں ناانصافی اتے زیادتی تھئی اے اساں اپݨے موقف تے ہمیشہ قائم رہ ڳیوں ۔ وزیراعظم آکھیے جو او 27ویں رات کوں مسجد نبویﷺ اچ ہن جݙاں انہاں کوں قبلہ اول مسجد اقصیٰ تے اسرائیلی حملے اتے اسرائیلی پولیس ولوں فلسطینیاں تے تشدد دا پتہ چلیا، 70 سال توں آبادی فلسطینیاں کوں اسرائیلی آباد کاراں انہاں دے گھراں توں نکال ݙتا اتے ایندے نال ھک نواں انتشار شروع تھی ڳیا ۔ وزیراعظم آکھیے جو غزہ اچ بمباری کیتی ڳئی تے طاقتور ترین فوج نہتے فلسطینیاں تے ظلم کیتے ٻالاں کوں بمباری کرتے شہید کیتا، ایں صورتحال تے میں اگلے ہی ݙینھ او آئی سی دے سیکرٹری جنرل نال ملاقات کیتی تے انہاں کوں آکھیے جو او آئی سی ایں معاملے تے سٹینڈ گھنے تے فلسطینیاں تے ظلم دے معاملے کوں اقوام متحدہ اچ چاتا ونڄے ۔ وزیراعظم آکھیے جو انہاں پاکستان واپس آتے شاہ سلمان نال ایں معاملے تے ڳالھ کیتی تے انہاں کوں آکھیے جو ایں معاملے تے آواز چاوݨی چاہیدی اے ۔ ترک صدر رجب طیب اردوان اتے ملائیشیا دے سابق وزیراعظم مہاتیر محمد نال وی ایہا ڳالھ کیتی۔ ول میݙی فلسطینی صدر محمود عباس نال ڳالھ تھئی اتے میں انہاں کوں یقین ݙیوایا جو نہ صرف ساری مسلم امہ بلکہ سارے انصاف پسند دنیا انہاں دے رلے کھڑی اے ۔ وزیراعظم آکھیے جو میں وزیر خارجہ شاہ محمود قریشی کوں ہدایت کیتی جو ایں مسئلے کوں اقوام متحدہ دی جنرل اسمبلی اچ چاون ۔ انہاں مسلمان ملکاں دے نال رل تے جیویں چنڳے طریقے ایں معاملے کوں چاتے میں انہاں کوں داد ݙٰینداں ۔وزیراعظم آکھیے جو ایں ساری صورتحال اچ چنڳٰی ڳالھ اے ہے جو ہݨ دنیا دی صلاح فلسطینیاں بارے بدلدی پئی اے ، میں مغرب اچ ٻہوں ویلھا گزاریے ، پہلے مغربی میڈیا اتے عوام اسرائیل تے تنقید نہ کریندے پن بلکہ اینویں لڳدا ہئی جو جیویں ظلم فلسطینیاں تے نی اسرائیل تے تھیندا پئے لیکن ہݨ پہلی واری اینویں ہے جو امریکہ اتے مغرب اچ وی اسرائیلی ظلم دے خلاف آوازیں چودیاں پن اتھاں دا میڈیا اتے سیاستدان وی تنقید کریندے پئن۔ وزیراعظم آکھیے جو فسلطینیاں دے حقوق کیتے وی دباؤ آسی تے وݙے وݙے ملک جیڑھے ہݨ تئیں اسرائیل دی حمایت کریندے رہین ہݨ او فلسطینیاں دے حقوق کیتے آواز چیسن تے فلسطینیاں کوں وی اسرائیل اچ برابر دے شہری دے طور تے حقوق ملسن ، او ݙینھ وختی آسی اساں ایں کیتے دعا کریندوں ۔