مخالف ڌر موجوده حڪومت جي لاءِ چئلنيج نه آهي: شاهه محمود قريشي

اسلام آباد – 21 جنوري (اي پي پي) پرڏيهي وزير شاهه محمود قريشي چيو آهي ته مخالف ڌر موجوده حڪومت جي لاءِ چئلنيج نه آهي، اسان کي ان کان ڪا به گهٻرائٽ نه آهي، اسان مخالف ڌر سان سياسي انداز ۾ منهن ڏيڻ جي صلاحيت رکون ٿا، اسان جو چئيلينج مهانگائي آهي، اسان مهانگائي تي ضابطو آڻڻ لاءِ قدم کڻي رهيا آهيون، مخالف ڌر ۾ اهو حوصلو نه آهي ته هو ان ڳالهه جو اعتراف ڪري ته موجوده حڪومت جي دور ۾ في ڪس آمدني 1457 ڊالر کان وڌي 1666 ڊالر ٿي وئي آهي، تحريڪ انصاف جي حڪومت جو چوٿون سال خوشحال پاڪستان جو سال هوندو، موجوده حڪومت پهريون ڀيرو پرڏيهي پاليسي کي نئون رخ ڏنو آهي، پرڏيهي پاليسي کي جيو پوليٽيڪل کان جيو اڪنامڪس بنيادن تي هموار ڪيو ويو آهي، عدالتن جي ڪارروائي تي اثر انداز ٿيڻ جي ڪوششن جي حوالي سان اسان کي ماضي مان سکڻ جي ضرورت آهي. قومي اسيمبلي ۾ خيالن جو اظهار ڪندي شاهه محمود قريشي چيو ته ڪالهه گلگت بلتستان جي اڳوڻي چيف جج رانا شميم بابت اسلام آباد هاءِ ڪورٽ راءِ ڏني آهي جنهن ۾ واضح طور تي ان جي موقف کي رد ڪندي فرد جرم لاڳو ڪئي وئي آهي، جيڪو نقطو نظر اچي رهيو آهي ان موجب اڳوڻي چيف جج توهين عدالت ڪئي آهي، اسلام آباد هاءِ ڪورٽ اهو سمجهيو آهي ته اها سوچيل سمجهيل ڪاوش هئي جنهن جو بنيادي مقصد عدالت جي فيصلي کي متاثر ڪرڻ هو، اسلام آباد هاءِ ڪورٽ جي راءِ ۾ سڄي مشق عدالت جي ساک کي متاثر ڪرڻ لاءِ رچائي وئي هئي. پرڏيهي وزير چيو ته سڀ ڄاڻون ٿا ته هڪ طرف مسلم ليگ (ن) جي قيادت سان جڙيل هڪ هاءِ پروفائل ڪيس جو آغاز ٿيڻو هو، اهڙي حالت ۾ پهرين هڪ اسٽوري اچي ٿي ۽ ان کانپوءِ هڪ بيان حلفي ايندو آهي، بيان حلفي ۾ ٻڌايو پيو وڃي ته اڳوڻي چيف جسٽس ثاقب نثار اسلام آباد هاءِ ڪورٽ جي جسٽس عامر فاروق کي هدايتون ڏنيون ته فلاڻي ڪيس ۾ ڇا ڪرڻو آهي، ضمانتون ناهن ڏيڻيون ۽ اليڪشن جي پڄاڻي تائين آزاد ناهي ٿيڻ ڏيڻو، قابل ذڪر ڳالهه اها آهي ته ٽي سال پهرين واقعو ٿئي ٿو، ان جو ڪو به ذڪر نٿو ڪيو وڇي، هن چيو ته جڏهن اسلام آباد هاءِ ڪورٽ ۾ اپيل داخل ٿيندي آهي ته ان جي لاءِ دير جا حربا استعمال استعمال ڪيا ويندا آهن، هڪ ڪيس ۾ التوا جون 15 درخواستون اچن ٿيون، حيرانگي جي ڳالهه آهي ته جنهن معزز ججز تي الزام لڳايو ويو، اهو ان بينچ ۾ شامل ئي نه هو جنهن جي سامهون ڪيس لڳو هو. پرڏيهي وزير چيو ته هاڻي اها ڳالهه واضح ٿي وئي آهي ته بيان حلفي لنڊن ۾ ڪهڙي طرح تيار ٿيو، انهي جي بنياد تي هڪ آڊيو ٽيپ به ميڊيا جي زينت بڻي جيڪا ڪيترائي ڏينهن بحث جو موضوع رهي، جڏهن ٽيپ جو فارنزڪ ٿيو ته ظاهر ٿيو ته اها ٽيپ حقيقتن تي ٻڌل نه آهي پر مختلف ٽڪرن کي جوڙي جعل سازي ڪئي وئي آهي. پرڏيهي وزير يو ته اسان کي ماضي مان سکڻ جي ضرورت آهي، هڪ طرف اها دعويِٰ ڪئي ويندي آهي ته عدليه جي آزادي جمهوريت ۽ ادارن جي لاءِ ضروري آهي ته ٻي طرف ان جي ابتڙ طرز عمل اختيار ڪيو ويندو آهي، جڏهن به عدالتي معاملن ۾ مداخلت جي ڪوشش ڪئي وئي ان جا بهترين نتيجا سامهون ناهن آيا، ماضي ۾ سپريم ڪورٽ تي حملو فائديدمند ثابت ناهي ٿيو، جسٽس قيوم کي من پسند فيصلن لاءِ ٽيليفون فائديمند ثابت ناهي ٿيو، تازي تاريخ ٻڌائي ٿي ته جڏهن ارشد ملڪ کي بليڪ ميل ڪيو ويو ۽ پورو هڪ ماحول ٺاهيو ويو ته اهو به فائديمند ثابت نه ٿيو، رانا شميم جو معاملو ٻڌڻي هيٺ آهي. پرڏيهي وزير چيو ته اهي سڀ ڪوششون عدالتي ڪارروائي تي اثر انداز ٿيڻ جي ڪوشس آهي، جيڪو خطرناڪ رجحان آهي ۽ ان تي اسان سڀني کي نوٽيس وٺڻ گهرجي. پرڏيهي وزير چيو ته مخالف ڌر پاران تنقيد ٿي رهي آهي ، تنقيد براءِ تنقيد سان ملڪ ۾مايوسي پکڙجندي آهي ۽ سيڙپڪارن جو اعتماد ڪمزور ٿي ويندو آهي، اسان جي معيشت بحالي طرف گامزن آهي، 2018ع ۾ جيڪا اقتصادي صورتحال تحريڪ انصاف جي حڪومت کي درپيش هئي اها قوم جي سامهون آهي، ٻن سالن ۾ حڪومت مشڪل فيصلا ڪيا ته جيئن معيشت کي مستحڪم ڪري سگهجي، ٽئين سال ۾ استحڪام کانپوءِ معيشت بحالي طرف گامزن آهي،اهو اسانه پر عالمي بئنڪ، بلومبرگ ۽ اڪانومسٽ چئي رهيا آهن، انهن ادارن موجب جي ڊي پي گروٿ 5.37 سيڪڙو آهي. پرڏيهي وزير چيو ته مسلم ليگ (ن) پنج سيڪڙو گروٿ ڪرڻ جي دعويٰ ڪري ٿي جن حالتن۾ مسلم ليگ ن اها واڌ جي شرح حاصل ڪئي ۽ جن حالتن ۾ موجوده حڪومت اها ڪاميابي حاصل ڪئي آهي ان ۾ فرق آهي، ڪووڊ – 19 جي حالتن ۾ 5.37 سيڪڙو جي گروٿ وڏي ڪاميابي آهي، زراعت ۾ 3.3 سيڪڙو جي ترقي ٿي آهي، پاڪستان ۾ 83 لک آبادگار گهراڻا آهن، جن جي زندگي ۾ بهتري آئي آهي، وڏين صنعتن جي پيداوار ۾ واڌارو ٿيو آهي، انهن سڀني جو مجموعي قومي پيداوار تي اثر پيو آهي ۽ ان مان ثابت ٿيو ته زرعي ٽرانفرميشن منصوبو ڪاميابي سان اڳتي وڌي رهيو آهي. پرڏيهي وزير چيو ته يوريا جي قيمتن م اضافو ٿيو آهي، حڪومت ان کان غافل نه آهي پر اهو به ڏسڻ گهرجي ته ان حوالي سان حڪومت جي وس ۾ جيڪو هو اهو حڪومت ڪيو اهي، نومبر جي مهيني ۾ گئس جي کوٽ باوجود ڀاڻ ٺاهيندڙ جي پلانٽس کي گئس فراهم ڪئي وئي، سالياني بنيادن تي جاري سال ۾ يوريا جي ساڍا 3 لک ٽن پيداوار ٿي آهي، ڪجهه ڊيلرز ۽ ذخيرو اندزو استحصال ڪري رهيا آهن، انهن جو تدارڪ ٿيڻ گهرجي ۽ حڪومت قدم به کڻي رهي آهي پر اهو به سوچڻ گهرجي ته هن وقت عالمي منڊي ۾ يوريا جي في ٻوري جي قيمت 8 کان 9 هزار روپين جي ويجهو آهي جڏهن ته پاڪستان ۾ هن وقت به 2500 روپين تي يوريا دستياب آهي، هن چيو ته يوريا ڪنٽرولڊ ريٽ تي هجڻ گهرجي پر اسان کي حقيقتن کي به منهن ڏيڻ گهرجي. هن چيوته اسان جو روانگي واپار وڌيو آهي، مٽاسٽا جي ناڻي ۾ واڌ ٿي آهي، عوام سمجهه رکي ٿي ۽ هو ڄاڻي ٿي ته حقيقت ڇا آهي. پرڏيهي وزير چيو ته مخالف ڌر موجوده حڪومت لاءِ چئلينج نه آهي، اسان کي ان کان ڪا به گهٻرائٽ نه آهي، اسان مخالف ڌر سان سياسي انداز ۾ منهن ڏيڻ جي صلاحيت رکون ٿا، اسان جو چئلينج مهانگائي آهي، اسان مهانگائي تي ضابطو آڻن لاءِ قدم کڻي رهيا آهيون. پرڏيهي وزير چيو ته عالمي منڊي ۾ گئس جي قيمتن ۾ تاريخي اضافو ٿيو آهي، سپينن جي قيمت ۾ 70 سيڪڙو، قزاقستان ۾ جيڪو ڪجهه ٿي رهيو آهي اسان جي سامهون آهي، عالمي منڊي ۾ پيٽروليم مصنوعات جون قيمتون وڌيون آهن، اهڙي طرح کاڌي پيتي جون شيون بلند ترين سطح تي آهن، ڪووڊ جي ڪري عالمي سپلائي چين ۾ به متاثر ٿيو آهي، هن چيو ته ترڪي ۾ ڪرنسي جي قدر ۾ 46.5 سيڪڙو، ارجنٽائن ۾ 17.3 سيڪڙو، ڪولمبيا ۾ 12.9 سيڪڙو، جاپان ۾ 9.1 سيڪڙو ۽ يورپي يونين ۾ 6.8 سيڪڙو ڪرنسي جو قدر گهٽ ٿيو آهي، مهانگائي جو ذڪر ڪندي اسان کي انهن ڳالهين کي نظر انداز نه ڪرڻ گهرجي. هن چيو ته مخالف ڌر ۾ اهو حوصلو ناهي ته هو ان ڳالهه جو اعتراف ڪري ته موجوده حڪومت جي دور ۾ في ڪس آمدني 1457 ڊالر کان وڌي 1666 ڊالر ٿي وئي آهي، هن چيو ته تحريڪ انصاف جي حڪومت جو چوٿون سال خوشحال پاڪستان جو سال هوندو، موجوده حڪومت پهريون ڀيرو پرڏيهي پاليسي کي نئون رخ ڏنو آهي، پرڏيهي پاليسي کي جيو پوليٽيڪل کان جيو اڪنامڪس بنيادن تي هموار ڪيو ويو آهي.